امتى بتحب الحياة

بجد سؤال بسيط لكن مش سهل تجاوب عليه من غير ماتقلب دماغك و تشغل حواسك كلها و تفتح صندوق ذكرياتك وتطلع أجمل ما فيه و تتخيل كل اللى مستنيه م الدنيا و عايش علشانه .. قد ما اعرف هاحاول


القشعرة الباردة اللى بتسرى ف جسمى لحظة ما اسمع جملة مزيكا تمس إحساسى بدون سابق تمهيد

تحية الجمهور فى المسرح لما أقدم فن راضى عنه و الناس تصقف جامد و خصوصاً الناس اللى ما اعرفهمش

أول لمسة ايد لوحده بتحبها -خصوصاً لو شدت ايديها اوام من الكسوف -

لما اكون فى حالة وجد شديدة وصادق جداً و مصدق و عينيه يدمعوا من التأثر

لما أشيل بإيديا طفل لسة مولود حالاً أول مرة - خصوصاً لو باحب أمه وأبوه -

مفاجآت صحابى لما يرتبوها من ورايا و يحبكوها كويس لحد ما اصدق و ألاقى نفسى قدام حاجة كان نفسى فيها فجأة

يفط المحلات القديمة جداً و بقايا إعلانات الشوارع بتاعت زمان

لما ننسى و نتحول عيال من غير اتفاق و نلعب فى الشارع بورقة أو إزازة فاضية و احنا بنضحك م اللى بنعمله

ساعتين الفجر ع البحر فى الشتا لوحدنا خالص و انا نايم على رجلها و صوابعها بتلاعب شعرى

ريحة شعر أبويا الطيبة

لما اشترى هدوم جديدة حاببها و بيرفيوم كان نفسى فيه

لما اسافر الفجر لوحدى بلد جديدة

أول كلمة بحبك اسمعها

الصبح بدرى قبل الناس ماتصحى ف بلكونة عالية و انا منى للسما

ريحة المطر -ريحة الدنيا بعد المطر -

العلامات لما تتحط ف طريقى علشان أعرف إنى صح

لما انفذ فن زى ما بتخيل بالظبط

لما طفل يضحك ف وشى بدون سبب

الفكرة لما ابقى عارف وانا بافكر فيها انها جديدة لانج

ريحة البن المحمص و طعم الفسدق

سندوتشات الكبدة الإسكندرانى و السجق والحاجة الساقعة

كباية التمر هندى اللى بتعمله امى بعد الصيام

وانا باتفرج على فيلم باحبه و دماغى مشَعَّرة على خفيف

حضن لحد بتحبه و واحشك أوى

منظر الجليد - من غير برده -

الشارع لما يبقى بتاعى - انا ماشى فيه لوحدى مبسوط و باغنى بصوت عالى -

ريحة بشرة الأطفال - خصوصاً حديثى الولادة